Tár

Það þykir ekki við hæfi að fullorðið fólk gráti og þá sérstaklega karlmenn.  En öll eða flest gerum við það, annað slagið.

Mér þótti merkilegt í X-factor þættinum síðasta föstudag þegar Einar Bárðarson felldi tár yfir brotthvarfi Allans úr keppninni.  Hin viðkunnanlega Halla Vilhjálms felldi einnig tár og mátti heyra ekkasog frá henni þegar hún var að reyna að komast í gegnum kynninguna.  Hún var ekki öfundsverð.

Það verður að teljast óalgengt að fullorðið fólk gráti í sjónvarpinu.  Í viðtali sem birtist í Fréttablaðinu sagði Halla að ýmislegt uppsafnað, ef ég man þetta rétt, hefði gert það að verkum að hún brast í grát þarna á sviðinu.

Ég þekki þetta. Stundum er innra með manni einhver ólga sem kallar fram grátur við minnsta tilefni.

Það er gott að gráta annað slagið, það hreinsar. Hlátur og grátur eru nauðsynleg en auðvitað hefur allt sín takmörk.

Núna fellir himininn tár á Akureyri.  Ekki veit ég hvort hann er sorgmæddur.  Ég er hins vegar pínu dapur í dag en felli þó ekki tár.......og öll él styttir upp um síðir.

Athugasemdir

[Friðrik (IP-tala skráð) 12.3.2007 kl. 23:34]

farðu ekki að grj....